Ümummilli Lider Heydər Əliyev - müstəqil Azərbaycan Konstitusiyasının müəllifidir” mövzusunda elmi-praktiki konfrans keçirilib
Dövlət Gömrük Komitəsinin Akademiyasının (DGKA) təşkilatçılığı ilə Bakı Gənclər Mərkəzində “Konstitusiya və Suverenlik İli”nə həsr olunmuş “Ümummilli Lider Heydər Əliyev - müstəqil Azərbaycan Konstitusiyasının müəllifidir” mövzusunda elmi-praktiki konfrans keçirilib.
Konfransdan əvvəl iştirakçılar Ümummilli Lider Heydər Əliyevin abidəsini ziyarət edib, abidə önünə gül dəstələri düzüblər.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və torpaqlarımızın müdafiəsi zamanı canından keçən qəhrəman şəhidlərimizin ruhu bir dəqiqəlik sükutla yad edilib və “Konstitusiya və Suverenlik İli”nə həsr olunan videoçarx nümayiş etdirilib.
Akademiyanın rəisi, gömrük xidməti general-mayoru Qulu Novruzov və Bakı Gənclər Mərkəzinin direktoru Nərgiz Babayeva tədbirdə çıxış edərək Azərbaycanın zəfərlə dolu inkişaf yolunda gənclərin fəal iştirakının, vətənpərvərlik ruhunda formalaşmasının və xalqımızın birliyinin mühüm əhəmiyyət daşıdığını vurğulayıblar. Eyni zamanda, tədbiri xüsusi təyinatlı ali təhsil müəssisələri arasında formalaşan səmərəli əməkdaşlığın təzahürü kimi qiymətləndirərək konfransın işinə uğurlar arzulayıblar.
Tədbir panel müzakirə ilə davam edib. Dövlət Gömrük Komitəsinin Aparatının rəhbərinin müavini, gömrük xidməti polkovnik-leytenantı Kənan Əsədovun moderatorluğu ilə keçirilən müzakirələrdə Dövlət Təhlükəsizliyi Xidmətinin Akademiyasının rəisi, general-mayor Elşad Nəsirov, İqtisadiyyat nazirinin müşaviri Hüseyn Hüseynov, Dövlət Vergi Xidmətinin rəisinin müavini, 3-cü dərəcəli dövlət vergi xidməti müşaviri Samirə Musayeva və Milli Müdafiə Universitetinin Hərbi Elmi Tədqiqat İnstitutunun rektoru, general-mayor Arif Həsənov Ümummilli Lider Heydər Əliyevin rəhbərliyi ilə hazırlanaraq 12 noyabr 1995-ci ildə ümumxalq referendumu ilə qəbul edilmiş Konstitusiyanın ölkəmizdə hüquqi, demokratik və dünyəvi dövlət quruculuğundakı rolundan bəhs ediblər.
Müzakirələr zamanı Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsi və antiterror əməliyyatı nəticəsində dövlət suverenliyinin tam bərpa edildiyi bildirilib, “Konstitusiya və Suverenlik İli”nin gənc nəslin vətənpərvərlik ruhunda tərbiyəsi və milli kimliyin qorunması baxımından xüsusi əhəmiyyət daşıdığı da vurğulanıb.
Sonda tədbir iştirakçılarının mövzu ilə bağlı sualları cavablandırılıb.
01.12.2025
