Baş müəllim

Hüseynov Şahin İslam oğlu

Dövlət Gömrük Komitəsinin Akademiyasının  “İxtisas fənləri “ kafedrasının baş müəllimi Şahin Hüseynov İslam oğlu  25 iyul 1951-ci  ildə  Kirovabad ( Gəncə) şəhərində anadan olmuşdur. 1968-cı ildə həmin şəhərdə orta məktəbi bitirib Bakı Dövlət Universitetinin kimya fakultəsinə daxil olub,  kimya müəllimi, mühəndis-kimyaçı ixtisası statusu əldə etmiş və oranı 1973-cü ildə bitirmişdir. 1973-1975-ci illərdə  Kürdəmir rayonu, Sovla kənd məktəbində  müəllim vəzifəsində işləmişdir.
1975- ci ildə ailəsi ilə Rusiya Fedarasiyasının, Ryazan Vilayətinin, Uxolovo rayonun, Uxolovo rayon mərkəzinə  köçmüş və orada  “Strommaşina” zavodunda  mühəndis, böyük mühəndis vəzifələrində işləmişdir. 1976-cı ildə Tula Vilayətinin, Novomoskovsk şəhər Daxili işlər İdarəsində milis nəfəri vəzifəsinə, 6 aydan sonra isə  cinayət-axtarış şöbəsində əməliyyat müvəkkili vəzifəsinə təyin edilmişdir.
1977-1984-cü illərdə cinayətkarlığa qarşı mübarizə ilə bağlı xidməti fəaliyyətdə əldə etdiyi nailiyyətlər nəzərə alınaraq həmin şöbədə baş əməliyyat-müvəkkili, cinayət-axtarış şöbə rəisinin müavini və rəisi vəzifələrinə təyin edilmişdir. Həmin illərdə cinayətkarlığa qarşı mübarizə fəaliyyətində əldə etdiyi uğurlar dəfələrlə SSRİ DİN-in və Tula Vilayət Daxili İşlər İdarəsinin, Novomckovck şəhər Daxili İşlər İdarəsinin Fəxri Fərmanları ilə  qeyd edilmişdir. 1979-cu ildə onun xidməti fəaliyyəti  qabaqcıl təcrübə kimi  mərkəzi aparat tərəfindən öyrənilərək ümumiləşdirilmiş  və bütün orqanlara öyrənilməsi tövsiyə edilmişdir.  1980-ci ildə o,  DİN-in  xidmətdə yüksək nəticələr  əldə edən əməkdaşları sırasında, xarici dövlətlərdə olmuşdur.
1984-cü ildə rəhbərliyin vəsatəti əsasında  SSRİ DİN-in İdarəçilik Akademiyasına göndərilmişdir. Qeyd edilən Akademiyaya imtahanları müvəffəqiyyətlə verərək əyani 1-ci  fakültəyə qəbul olunmuş və 1986-cı ildə oranı bitirərək “ Hüquqşünas və Hüquq-mühafizə fəaliyyətinin təşkil olunması ” ixtisasları üzrə ali təhsil diplomu almışdır.
Akademiyani bitirdikdən sonra   həmin il  Tula şəhərinin Proletar rayonunun  Daxili İşlər İdarəsi rəisinin  əməliyyat işləri üzrə rəis müavini, rəis əvəzi vəzifələrində xidmətini davam etdirmişdir.
1988 –cu ildən ailə vəziyyəti ilə əlaqədar vətənə qayıtmış,  Azərbaycan Respublikası DİN-in Xüsusi Orta Milis Məktəbinin “ Xüsusi Fənlər Silsiləsinin”  rəisi vəzifəsində, 1992-ci ildən isə Polis  Akademiyasının “Əməliyyat-axtarış fəaliyyəti” kafedrasının rəisi vəzifələrində xidmət etmişdir.
O,  daxili işlər orqanlarında qüsursuz xidmətlərinə görə I, II və III dərəcəli medallarla, milis əlaçısı döş nişanı ilə təltif edilmişdir. Peşə hazırlığına səviyyəsinə görə ona  DİN-in əmri ilə “usta” dərəcəsi verilmişdir, ehtiyatda polis polkovnikidir.
2011-ci ildə xidmətdə son yaş həddinə çatdığına görə təqaüdə çıxmışdır. Həmin ildən müqavilə əsasında DGK-nin Tədris Mərkəzində  xidmətə yeni qəbul  edilən əməkdaşlara “Gömrük hüququ”, ixtisasartırma kursların dinləyicilərinə isə “Gömrük orqanlarının əməliyyat-axtarış fəaliyyəti” fənlərinin tədrisi ilə məşğul olmuşdur. Son illərdə  Vergilər Nazirliyinin, Respublika Baş Prokurorluğunun dəvəti ilə onların tədris müəssisələrinin ixtisasartırma kurslarında tədris prosesində silsilə mühazirələr oxuyur və praktiki dərslər aparır.
Onun təşkilatçılığı ilə Polis Akademiyasında  “ Əməliyyat-axtarış fəaliyyətinin nəzəri, qanunvericilik və təcrübi aspektləri”   və “ Narkomanlığa və narkotik vasitələrin qanunsuz dövriyyəsinə qarşı mübarizənin aktual problemləri” adlı respublika səviyyəli  iki elmi-praktiki konfrans keçirilmişdir. Konfransın materialları nəşr edilmiş tədris prosesində və elmi- praktiki fəaliyyətdə istifadə edilir.
Azərbaycan hüquq-mühafizə orqanlarında xidmət etdiyi dövrdə onun bilavasitə iştirakı ilə  müvafiq hüquq-mühafizə orqanlarının əməliyyat-axtarış aparatlarının  “Əməliyyat-axtarış fəaliyyətinin təşkili və həyata keçirilməsinə dair” Təlimatlar hazırlanmış və xidməti fəaliyyətdə bu gün də istifadə edilir.
1988-1989-cu illərdə  erməni təcavüzünə qarşı Qarabağ uğrunda  aparılan döyüşlərdə iştirak etmişdir, müharibə veteranıdır.
Daxili işlər orqanlarının tədris müəssisələrində xidmət etdiyi müddətə özü tərəfindən  və digər– müəllim –professor heyəti ilə müştərək yazılan 50-dən çox dərslik, dərs ( TN -nin qrifi olan) və tədris-metodiki vəsaitlərin müəllifidir. Onun tərəfindən cinayətkarlığa qarşı mübarizənin, o cümlədən əməliyyat-axtarış fəaliyyətinin müxtəlif problemləri  və onların həllinə dair elmi-nəzəri və praktiki yönümlü  49  məqalə hazirlanmış  və AAK-nin siyahısına daxil olan jurnallarda  ölkəmizdə və Rusiya Federasiyasında nəşr edilmişdir. Qeyd edilən dərs vəsaitləri ali məktəblərin tədris prosesində istifadə edilir.
O, ABŞ, Türkiyə, RF-də keçirilən hüquq-mühafizə fəaliyyətinin müxtəlif istiqamətlərinə həsr edilmiş elmi-praktiki konfrans, seminar və treninqlərdə  iştirak etmişdir.
Onun tərəfindən DGK- nin Akademiyası və digər ali məktəblərin   tələbələri, hüquqşünaslar,  həmçinin praktiki işçilər, elmi- tədqiqat işləri ilə məşğul olan şəxslər üçün nəzərdə tutulan 2016  və 2018-ci illərdə  “Narkotik vasitələrin, psixotrop maddələrin qanunsuz dövriyyəsinə qarşı mübarizənin elmi- nəzəri, hüquqi, təcrübi məsələləri və problemlərinin həlli yolları” adlı dərs vəsaiti  və “Əməliyyat-axtarış fəaliyyətinin əsasları”( elmi-nəzəri, hüquqi əsasları və təcrübi aspektləri) adlı açıq qrifli dərsik hazırlanmış praktiki fəaliyyətdə və tədris prosesində istifadə edilir.
Evlidir, beş övladı var.